అరుదైన భవదూరుఁడగు నీతఁడు

నా బ్లాగు మిత్రులందరికీ నా బ్లాగుకి నా పునరాగమన సందర్భంలో శుభాకాంక్షలు తెలుపుకుంటున్నాను. ఇంతకాలం బ్లాగుకు దూరంగా ఉన్నాను. కాని ఈ రోజెందుకో బ్లాగు ద్వారా మిమ్మల్నందఱినీ పలకరించా లనిపించింది. ఈ బ్లాగులో అన్నమాచార్యులవారి దశావతారాల సంకీర్తన నొకదానిని మీ అందరితో పంచుకోవాలనిపించి ఈ ప్రయత్నం.

20 రేకు లలిత(అవతారాలు)

అరుదైన భవదూరుఁడగు నీతఁడు
అరిది భవములందునతఁడు వో యితఁడు II పల్లవి II

కొడుకుటెక్కెమురూపు కోరి కైకొని పెద్ద
కొడుకు కొరకుఁగా గోరపడి
కొడుకువైరి భక్తిఁ గూడిన యాతని
నడవిలోఁ జంపిన యతఁడు వో యితఁడు IIఅరుII మత్స్యావతారము?

ఆలితమ్ముని రాకకలరి మెచ్చెడిచోట
ఆలుఁ దానును నుండి యందులోన
ఆలిచంటికింద నడ్డమువడుకున్న
ఆలవాలమువంటి అతఁడు వో యితఁడు IIఅరుII కూర్మావతారము?

సవతి తమ్ముఁడు గోవుఁ జంపఁ బట్టుక పోయి
సవతి తమ్మునియింట సడిఁబెట్టఁగా
సవతులేనిపంటఁ జప్పరించివేసి
ఆవల యివల సేసి నతఁడు వో యితఁడు IIఅరుII వరాహావతారము?

తొడ జనించిన యింతి దొరకొనాపద సేయ(?)
దొలఁ (డ?)గి తోలాడెడి దొడ్డవాని
తొడమీఁద నిడి వానికడుపులో తొడవులే
యడియాలమగు మేని యతఁడు వో యితఁడు IIఅరుII నరసింహావతారము?

పదము దానొసఁగుచుఁ బదమడుగగఁ బోయి
పదము వదము మోవఁ బరగఁ జేసి
పదముననె దివ్యపదమిచ్చి మనుమని
నదిమి కాచినయట్టి అతఁడు వో యితఁడు IIఅరుII వామనావతారము

అత్తకొడుకుపేరి యాతనిఁ దనకూర్మి
యత్తయింటిలోన నధికుఁ జేసి
మత్తిల్లు తనతోడ మలసిన యాతని
నత్తలిత్తల సేసినతఁడు వో యితఁడు. IIఅరుII పరశురామావతారము?

పాముతోడుతఁ బోరి పంతముగొనువాని
పాముకుఁ బ్రాణమై పరగువాని
ప్రేమపుఁ దనయుని బిరుదుగా నేలిన
ఆమాటనిజముల అతఁడు వో యితఁడు. IIఅరుII కృష్ణావతారము?

ఎత్తుక వురవడినేఁగెడి దనుజుని
యెత్తుకలుగు మద మిగుర మోఁది
మత్తిల్లు చదువుల మౌనిఁ జం..........
అత్తలేని యల్లుఁడతఁడు వో యితఁడు. IIఅరుII రామావతారము

బిగిసి మేఁకమెడ పిసికెడి మాటలు
పగలుగాఁగ రేయివగలు సేసి
జగములోన నెల్ల జాటుచుఁ బెద్దల
అగడుసేయఁ బుట్టినతఁడు వో యితఁడు. IIఅరుII బలరామావతారము?

మెట్టనిచోట్ల మెట్టుచుఁ బరువులు
పెట్టెడిరాయ....................
కట్టెడికాలము కడపట నదయుల(?)
నట్టులాడించిన అతఁడు వో యితఁడు. IIఅరుII కల్క్యావతారము

తలఁకకిన్నియు జేసి తనుఁగాని యాతని
వలెనె నేఁడు వచ్చి వసుధలోన
వెలుఁగొంది వేంకటవిభుఁడై వెలసిన
యలవిగాని విభుఁడతఁడు వో యితఁడు. IIఅరుII వేంటేశ్వరస్వామి 4-8 ( నిడురేకులలోని 77 సంకీర్తలలో 8వ సంకీర్తన యిది)

ఇది దశావతారాల కీర్తన. అందుచేత మనం వరుసగా మత్స్య, కూర్మ, వరాహ, వామన, నారసింహ, పరశురామ,బలరామ, రామ,కృష్ణ, కల్క్యావతారాలు గుర్తులో ఉంచుకుని ఈ కీర్తనని అర్థం చేసుకొనే ప్రయత్నం చేయాలి. అన్నమయ్య మన తెలివితేటలకి జ్ఞాపకశక్తికి పరీక్ష పెట్టినట్లుగా ఉన్నది ఈ సంకీర్తన. నాకు అర్థం పూర్తిగా తెలియటం లేదు. ఎవరైనా పెద్దలు గాని, పిన్నలుగానీ ఈ సమస్యను విపులీకరించి నాకు సుబోధకమయ్యేలా విడమరిచి చెప్తే వారికి నేను కృతజ్ఞుడనై ఉంటాను.
అత్తలేని అల్లుడు అంటే రామావతారము అనుకొన్నాను.సీతాదేవి అయోనిజ కాబట్టి. పదమడుగబోయి అంటే వామనావతారము బలిని దానమడిగిన విధానం మూడు అడుగులు( పదములు) కాబట్టి.కట్టెడి కాలము కడపట అంటే చివరలో వచ్చే కల్క్యావతార మనిపించింది.

అదె వచ్చె నిదె వచ్చె నచ్యుతు సేనాపతి

సాళంగనాట అదె వచ్చె నిదె వచ్చె నచ్యుతు సేనాపతి పదిదిక్కులకు నిట్టె పారరో యసురలు IIపల్లవిII గరుడధ్వజం బదె ఘనశంఖరవ మదె సరుసనే విష్ణుదేవుచక్ర మదె మురవైరిపంపు లవె ముందరి సేన లవె పరచి గగ్గులకాడై పారరో దానవులు. IIఅదెII తెల్లని గొడుగు లవె దేవదుందుభులు నవె యెల్ల దేవతల రథా లింతటా నవె కెల్లు రేఁగీ నిక్కి హరికీర్తి భుజము లవె పల్లపు పాతాళానఁ బడరో దనుజులు. IIఅదెII వెండి పైఁడిగుదె లవె వింజామరము లవె మెండగు కై వారాలు మించిన వవె దండి శ్రీ వేంకటపతి దాడిముట్టె నదె యిదె బండుబండై జజ్జరించి పారరో దైతేయులు. IIఅదెII 2-70

సందడి విడువుము సాసముఖా

ధన్నాసి
సందడి విడువుము సాసముఖా
మంధర ధరునకు మజ్జన వేళా                IIపల్లవిII

అమరాధిపు లిడుఁ డాలవట్టములు
కమలజ పట్టుము కాళాంజి
జమిలి చామరలు చంద్రుఁడ సూర్యుఁడ
అమర నిడుఁడు పరమాత్మునకు.             IIసందII

అణిమాదిసిరుల నలరెడు శేషుఁడ
మణిపాదుక లిడు మతి చెలఁగా
ప్రణుతింపు కదిసి భారతీరమణ
గుణాధిపు మరుగురు బలుమరును.         IIసందII

వేద ఘోషణము విడువక సేయుఁడు
ఆదిమునులు నిత్యాధికులు
శ్రీ దేవుండగు శ్రీ వేంకటపతి
ఆదరమున సిరు లందీ వాఁడె.                IIసందII 1-12

కాళాంజి = తమ్మపడిగము, పతద్గ్రాహము ( పిల్లి అంటే బిడాలము అన్నట్టుంది కదూ)

శ్రీ అన్నమాచార్య సంకీర్తనా గానం

విజయవాడ శ్రీ తుమ్మలపల్లి కళాక్షేత్రంలో జరగబోయే శ్రీ అన్నమాచార్య సంకీర్తనా  గానం

5 వ నంబరు గుంపు వారిచే గానం చేయబడు సంకీర్తనలు - వాటి వివరములు. మొదటి సంకీర్తన - నానాటి బతుకు నానాటి బతుకు నాటకము కానక కన్నది కైవల్యము IIపల్లవిII పుట్టుటయు నిజము పోవుటయు నిజము నట్టనడిమి పని నాటకము యెట్ట నెదుట కల దీ ప్రపంచము కట్ట కడపటిది కైవల్యము. IIనానాII కుడిచే దన్నము కోక చుట్టెడిది నడు మంత్రపు పని నాటకము వొడి గట్టుకొనిన వుభయ కర్మములు గడి దాటినపుడే కైవల్యము. II నానా II తెగదు పాపము తీరదు పుణ్యము నగి నగి కాలము నాటకము యెగువనె శ్రీ వేంకటేశ్వరు డేలిక గగనము మీదిది కైవల్యము. IIనానాII రెండవ సంకీర్తన - మర్ద మర్ద మమ బంధాని నాట

మర్ద మర్ద మమ బంధాని దుర్దాంత మహాదురితాని IIపల్లవిII చక్రాయుధ రవిశతతేజోంచిత సక్రోధ సహస్ర ప్రముఖా విక్రమక్రమా విస్ఫులింగకణ నక్రహరణ హరినవ్యకరాంకా. II మర్దII కలితసుదర్శన కఠిన విదారణ కులిశ కోటిభవ ఘోషణా ప్రళయానల సంభ్రమవిభ్రమకర రళితదైత్యగళరక్తవికీరణా. II మర్ద II హితకర శ్రీ వేంకటేశ ప్రయుక్త సతత పరాక్రమజయంకర చతురో2హం తే శరణం గతో2స్మి యితరాన్ విభజ్య యిహ మాం రక్ష. II మర్ద II2-81 మూడవ సంకీర్తన - రామ రామ రామకృష్ణ రామ రామ రామకృష్ణ రాజీవలోచన నీకు దీము వంటి బంటననే తేజమే నాది II పల్లవిII వారధి దాటి మెప్పించ వాయుజుడ నే గాను సారె చవుల మెప్పించ శబరి గాను బీరాన సీత నిచ్చి మెప్పించ జనకుండ గాను ఏ రీతి మెప్పింతు నన్నెట్లా గాచేవో. II రామ II ఘనమై మోవి మెప్పించ గరుడుడ నే గాను కొన కామ సుఖమిచ్చు గోపిక గాను వినుతించి మెప్పించ వేయినోళ్ళ భోగి గాను నిన్నెట్లు మెప్పించు నన్ను గాచే దెట్లా. II రామ II నవ్వుచు పాడి మెప్పించ నారదుడ నే గాను అవ్వల ప్రాణమీయ జటాయువు గాను ఇవ్వల శ్రీ వేంకటేశ యిటునీకె శరణంటి అవ్వల నా తెరువిదే రక్షించే దెట్లా. II రామ II నాల్గవ సంకీర్తనవాఁడె వేంకటేశుఁడనే వాఁడే వీఁడు (భూపాళం పుస్తకం లోనిది) పాడాల్సినది (రసికరంజని)       వాఁడె వేంకటేశుఁడనే వాఁడె వీఁడు వాఁడి చుట్టుఁ గైదువవలచేతివాఁడు II పల్లవిII కారిమారసుతునిచక్కనిమాటలకుఁ జొక్కి  చూరగా వేదాలగుట్టు చూపినవాఁడు తీరని వేడుకతో తిరుమంగయాళువారి- ఆరడిముచ్చిమికూటి కాసపడ్డవాఁడు II వాఁడె II పెరియాళువారిబిడ్డ పిసికి పై వేసిన- విరులదండల మెడవేసినవాఁడు తరుణి చేయివేసిన దగ్గరి బుజము చాఁచి  పరవశమై చొక్కి పాయలేనివాఁడు II వాఁడె II పామరులఁ దనమీఁది పాటలెల్లాఁ బాడుమంటా భూమికెల్లా నోర నూరిఁపోసినవాఁడు మామ కూఁతురల మేలుమంగనాచారియుఁ దాను గీముగానే వేంకటగిరి నుండేవాఁడు. II వాఁడె II ఐదవ సంకీర్తన - ఎదుట నున్నాడు వీడె ఎదుట నున్నాడు వీడె ఈ బాలుడు మది తెలియమమ్మ ఏ మరులో కాని II పల్లవి II పరమ పురుషుడట పసుల గాచెనట సరవులెంచిన విన సంగతాయిది పరియె తానట ముద్దులందరికి జేసెనట ఇరవాయనమ్మ సుద్దులేటివో గాని II ఎదుట II వేదాల కొడయడట వెన్నలు దొంగిలెనట నాదించి విన్నవారికి నమ్మికా యిది ఆదిమూల మీతడట ఆడికెల చాతలట కాదమ్మ ఈ సుద్దులెట్టికతలో కాని II ఎదుట II అల బ్రహ్మ తండ్రియట యశోదకు బిడ్డడట కొలదొకరికి చెప్పకూడునా యిది తెలిసి శ్రీ వేంకటాద్రి దేవుడై నిలిచెనట కలదమ్మ తనకెంతో కరుణో కాని II ఎదుట II  ఆఱవ సంకీర్తన - జయ జయ రామ జయ జయ రామ సమర విజయ రామ భయహర నిజ భక్త పారీణ రామా II పల్లవి II జలధి బంధించిన సౌమిత్రి రామా సెలవిల్లు విరచిన సీతారామా అల సుగ్రీవు నేలిన అయోధ్య రామా కలిగి యజ్ఞము కాచె కౌసల్య రామా II జయ II అరి రావణాంతక ఆదిత్యకుల రామా గురు మౌనులను గాచే కోదండ రామా  ధర నహల్య పాలిటి దశరథ రామా హరురాణి నుతుల లోకాభి రామా II జయ II అతి ప్రతాపముల మాయామృగాంతక రామా సుత కుశలవ ప్రియ సుగుణ రామా వితత మహిమల శ్రీవేంకటాద్రి రామా మతిలోన బాయని మనువంశ రామా II జయ II ఏడవ సంకీర్తన - వెనకేదో ముందరేదో వెనకేదో ముందరేదో వెర్ఱి నేను, నా మనసు మరులు దేర మందే దొకో II పల్లవి II చేరి మీదటి జన్మము సిరులకు నోమేగాని ఏ రూపై పుట్టుదునో ఎఱగ నేను కోరి నిద్రించ పరచుకొన నుద్యోగింతు కాని సారె లేతునో లేవనో జాడ తెలియ ( నేను ) II వెన II తెల్లవారినపుడెల్లా తెలిసితి ననేకాని కల్ల యోదొ నిజమేదో కాన నేను వల్ల చూచి కామినుల వలపించే గాని మొల్లమై నా మేను ముదిసిన దెఱగ II వెన II పాపాలుచేసి మరచి బ్రదుకు చున్నాడగాని వైపుగ చిత్రగుప్తుడు వ్రాయుటెఱగ ఏపున శ్రీవేంకటేశు నెక్కడో వెదకేగాని నాపాలి దైవమని నన్నుగాచు టెరగ II వెనII 8 వ సంకీర్తన - రామచంద్రు డితడు రామచంద్రుడితడు రఘువీరుడు కామిత ఫలము లియ్యగలిగె నిందరికి II పల్లవిII గౌతము భార్యపాలిటి కామధేను వితడు ఘాతల కౌశికుపాలిటి కల్పవృక్షము సీతాదేవి పాలిటి చింతామణి ఇతడు ఈతడు దాసులపాలిటి ఇహపర దైవము II రామ II పరగ సుగ్రీవు పాలి పరమ బంధుడితడు సరి హనుమంతు పాలి సామ్రాజ్యము నిరతి విభీషణు పాలి నిధానము ఈతడు గరిమ జనకు పాలి ఘనపారిజాతము. II రామ II తలప శబరి పాలి తత్త్వపు రహస్యము అలరి గుహుని పాలి ఆదిమూలము కలడన్న వారి పాలి కన్ను లెదుటి మూరితి వెలయ శ్రీ వేంకటాద్రి విభు డితడూ. II రామ II  9 వ సంకీర్తన - ఆదిదేవ పరమాత్మా దేవగాంధారి ( పుస్తకములో నున్నది) పాడవలసినది (సింధు భైరవి ) ఆదిదేవ పరమాతుమా వేదవేదాంతవేద్య నమో నమో II పల్లవి II పరాత్పరా భక్త భవభంజనా  చరాచరలోకజనక నమో నమో II ఆది II గదాధరా వేంకటగిరినిలయా సదానంద ప్రసన్న నమో నమో II ఆది II 10 వ సంకీర్తన - శరణు శరణు  శరణు శరణు సురేంద్ర సన్నుత శరణు శ్రీ సతి వల్లభ శరణు రాక్షస గర్వ సంహర శరణు వేంకటనాయకా ii శరణు ii కమలధరుడును కమల మిత్రుడు  కమల శత్రుడు పుత్రుడు క్రమముతో మీ కొలువుకిప్పుడు కాచినా రెచ్చరికయా ii శరణు ii అనిమిషేంద్రులు మునులుదిక్పతు లమర కిన్నర సిద్ధులు ఘనతతో రంభాదికాంతలు కాచినా రెచ్చరికయా ii శరణు ii ఎన్నగల ప్రహ్లాద ముఖ్యులు  నిన్ను కొలువగ వచ్చిరి విన్నపము వినవయ్య తిరుపతి వేంకటాచల నాయకా. ii శరణు ii

వినరయ్య నరసింహవిజయము జనులాల

నాట

వినరయ్య నరసింహవిజయము జనులాల

అనిశము సంపదలు నాయువు నొసఁగును . IIపల్లవిII

మొదలఁ గొలువుకూటమున నుండి కశిపుఁడు

చదివించెఁ బ్రహ్లాదుని శాస్త్రములు

అదన నాతఁడు నారాయణుఁడే దైవమనె

అదిరిపడి దైత్యుఁడు ఆతనిఁ జూపుమనె .    IIవినరII

అంతటఁ బ్రహ్లాదుఁడు ' అన్నిటానున్నాఁ ' డనియె

పంతమున దానవుఁడు బాలునిఁ జూచి

యెంతయుఁ గడఁకతోడ ' ఇందులోఁ జూపు ' మని

చెంతనున్న కంబము చేతఁగొని వేసె .     IIవినరII

అటమీఁదట బ్రహ్మాండం బదరుచు

కుటిలభయంకరఘోషముతో

చిట చిట చిటమని పెట పెట పెటమని

పటపట మనుచును బగిలెఁ గంబము .    IIవినరII

కులగిరు లదరెను కుంభిని వడఁకెను

తలఁకిరి దైత్యులు తల్లడిలి

కలఁగెను జగములు కంపించె జగములు

ప్రళయకాలగతిఁ బాటిల్లె నపుడు .    IIవినరII

ఘననారసింహుఁ డదె కంబమునందు వెడలె

కనుపట్టె నదిగొ చక్రజ్వాలలు

మునుకొని వెడలెఁ గార్ముకముక్తశరములు

కనకకశిపునకుఁ గలఁగె గుండియలు .   IIవినరII

అడరె నద్దేవునికోపాగ్నులు బెడిదపు -

మిడుఁగురులతోడుత మిన్నులుముట్టి

పిడుగులురాలేటిభీకరనఖరములు

గడుసు రక్కసునికి గాలములై తగిలె .    IIవినరII

తొడికి పట్టి విష్ణుఁడు తొడమీఁద నిడుకొని

కడుపు చించెను వానిగర్వమడఁగ

వెడలెఁ జిల్లున వానివేఁడి నెత్తురు నింగికి

పొడి వొడియాయ శత్రుభూషణములెల్లను .   IIవినరII

నెళ నెళన విరిచె నిక్క వానియెముకలు

పెళపెళ నారిచి పెచ్చు వెరిగె హరి

జళిపించి పేగులు జంద్యాలుగా వేసుకొనె

తళుకుఁగోరలు తళతళమని మెరిచె .     IIవినరII

పెటలించి నరములు పెరికి కుప్పలువేసి

గుటగుటమని రొప్పె గోవిందుఁడు

చిటిలించి కండలు చెక్కలు వారఁజెండి

కుటిలదానవుఁ జూచి ' ఖో ' యని యార్చెను .   IIవినరII

తెంచి శిరోజములు దిక్కులకు వాని -

పంచప్రాణములుగొనెఁ బరమాత్ముఁడు

అంచెల నీరీతిని ప్రహ్లాదునిపగ నీఁగె

మించి దేవతలు మితిమీఱి జయవెట్టిరి .    IIవినరII

అప్పు డిందిరాదేవి యంకమునఁ గూచుండె

వొప్పుగ శాంతమందె నహోబలేశుఁడు

తప్పక కోనేటిదండఁ దానై యిందును నందు

చిప్పిల వరములిచ్చీ శ్రీవేంకటేశుఁడు . II వినర II 4-513

తొల్లి కలవే ఇవియు తొల్లి తానుఁ గలడే కల్లయునుఁ గాదు ఇది కడు నిజము గాదు.

   పాడి
తొల్లి కలవే ఇవియు తొల్లి తానుఁ గలడే
కల్లయునుఁ గాదు ఇది కడు నిజము గాదు.     IIపల్లవిII

కను దెరచినంతనే  కలుగు నీ జగము
కనుమూసినంతనే కడు శూన్యమౌను
కనురెప్ప మరఁగుననె కలిమియును లేమియును
తన మనోభావనలఁ దగిలి తోఁచీని.           IIతొల్లిII

తలఁచినంతనె యెంత దవ్వయిన గాన్పించు
తలఁపు మరచినమతికి దట్టమౌఁ దమము
పొలసి మతిమరఁగుననె పుట్టుటలుఁ బోవుటలు
పలుచంచలవికారభావ మీ గుణము.      IIతొల్లిII

ముందు దాఁ గలిగితే మూఁడు లోకములుఁ గల
వెందు దా లేకుంటే నేమియును లేదు 
అంది శ్రీవేంకటేశుఁ డాత్మలోననె వీఁడె
కందువల నితని సంకల్ప మీపనులు.     IIతొల్లిII
4-73

అడర శ్రావణబహుళాష్టమి నేఁ డితఁడు నడురేయి జనియించినాఁడు చూడఁగదరే.

కృష్ణాష్టమి సందర్భంగా బ్లాగ్మిత్రులందరికీ నా శుభాకాంక్షలు
రామక్రియ
అడర శ్రావణబహుళాష్టమి నేఁ డితఁడు
నడురేయి జనియించినాఁడు చూడఁగదరే. IIపల్లవిII

గొంతిదేవిమేనల్లుఁడు గోపసతులమగఁడు
పంతపుపాండవులకు బావమరఁది
వంతుతో వసుదేవదేవకులకుమారుఁడు
ఇంతటికృష్ణుఁడు జనియించినాఁడుగదరే. IIఅడరII

బలరామునితమ్ముఁడు పంచసాయకునితండ్రి
మలసి మేటైనయభిమన్యునిమామ
లలి సాత్యకిసుభద్రలకుఁ దోబుట్టినయన్న
ఇలపైఁ గృష్ణుఁడు జనియించినాఁడుగదరే. IIఅడరII

శూరసేనుమనుమఁ డచ్చుగ ననిరుద్దుతాత
పౌరవయాదవలోకబాంధవుఁడు
అరయ శ్రీవేంకటేశుఁ డలమేల్మంగకుఁ బతి
యీరీతిఁ గృష్ణుఁడు జనియించినాఁడుగదరే. IIఅడరII ౪-౧౬౦

శ్రావణబహుళాష్టమి జయంతి నేఁడు సేవించరో నరులాల శ్రీకృష్ణుఁడితఁడు.

శ్రావణబహుళాష్టమి(కృష్ణ జయంతి) సందర్భంగా బ్లాగ్మిత్రులందరికీ నా శుభాకాంక్షలు.
సాళంగనాట
శ్రావణబహుళాష్టమి జయంతి నేఁడు
సేవించరో నరులాల శ్రీకృష్ణుఁడితఁడు. IIపల్లవిII

భావింప వసుదేవునిపాలిటిభాగ్యదేవత
దేవకిగనినయట్టి దివ్యరత్నము
చేవమీర సురలరక్షించేకల్పతరువు
యీవేళ జన్మించినాఁడు యిదె కృష్ణుఁడు. IIశ్రావణII

హరవిరంచాదులకు నాదిమూలకారణము
పరమమునులతపఃఫలసారము
గరుడోరగేంద్రులకుఁ గలిగిన నిధానము
యిరవుగా నుదయించె నిదె కృష్ణుఁడు. IIశ్రావణII

బలు యోగీశ్వరుల బ్రహ్మానందము
చెలఁగుభాగవతులచింతామణి
అలమేల్మంగకుఁ బతి యట్టె శ్రీవేంకటాద్రి-
నిలపై జన్మించినాఁడు యిదె కృష్ణుఁడు. IIశ్రావణII ౪-౧౩౯

ఇంతకంటే నేమి సేసే మిదే మా మానసపూజ

శంకరాభరణం
ఇంతకంటే నేమి సేసే మిదే మా మానసపూజ
సంతతము నీవు తొల్లే సర్వసంపన్నుఁడవు. IIపల్లవిII

అంతర్యామివైనమీకు నావాహన మదివో
అంతటా విష్ణుఁడ మీకు నాసనము వేసినది
పంతపుఁ కోనేరే మీకుఁ బలుమారు నర్ఘ్యము
చెంతనే గంగాజలముచల్లేమీకుఁ బాద్యము. IIఇంతII

జలధు లన్నియును నాచమనియ్యము మీకు
అల యా వరుణజల మిదియే స్నానము
పలనుగా మీమహిమలే వస్త్రాభరణములు
అల వేదములే మీకు యజ్ఞోపవీతములు. IIఇంతII

ఇరవుగఁ గుబ్జ తొల్లిచ్చినదే మీకు గంధము
ధర మాలాకారునిపూదండలే మీకు పువ్వులు
ఉరుగతి మౌనులహోమమే మీకు ధూపము
తిరమైన మీకు రవితేజమే దీపము. IIఇంతII ౨-౨౭౨

పై పాటలో పంచదశోపచారాలే ఉన్నాయి. నీరాజనము తప్పిపోయినది.

రామచంద్రుఁడితఁడు రఘువీరుడు

Get this widget | Track details | eSnips Social DNA

శ్రీరాగం
రామచంద్రుఁడితఁడు రఘువీరుఁడు
కామితఫలములియ్యఁ గలిగె నిందరికి. IIపల్లవిII

గౌతముభార్యపాలిటి కామధేనువితఁడు
ఘాతలఁ గౌశికుపాలికల్పవృక్షము
సీతాదేవిపాలిటిచింతామ ణీతఁడు
యీతఁడు దాసులపాలియిహపరదైవము. IIరామII


పరగ సుగ్రీవుపాలిపరమబంధుఁ డీతఁడు
సరి హనుమంతుపాలిసామ్రాజ్యము
నిరతి విభీషణునిపాలినిధానము( నీతడు)
గరిమ జనకుపాలిఘనపారిజాతము. IIరామII

తలఁప శబరిపాలితత్వపురహస్యము
అలరి గుహునిపాలిఆదిమూలము
కలఁడన్నవారిపాలికన్ను లెదుటిమూరితి
వెలయ శ్రీవేంకటాద్రివిభుఁ డీతఁడు. IIరామII ౪-౧౪౭

వెగ్గల మింతా వృథా వృథా

నాగవరాళి
వెగ్గల మింతా వృథా వృథా
తగ్గి పరులతో దైన్యములేలా. IIపల్లవిII

పెంచఁగఁబెంచఁగఁ బెరగీ నాసలు
తుంచఁగఁదుంచఁగఁ దొలఁగు నవి
కంచము కూడును కట్టిన కోకయు
వంచనమేనికి వలసినదింతే. IIవెగ్గలII

తడవఁగఁదడవఁగఁ దగిలీ బంధము
విడువఁగ విడువఁగ వీడునవి(ది?)
గుడిశలోన నొకకుక్కిమంచమున
వొడలు సగమునను వుండెడిదింతే. IIవెగ్గలII

మరవఁగమరవఁగ మాయలే యింతా
మురహరుఁదలచితే మోక్షము
నిరతి శ్రీవేంకటనిలయుఁడే కాయపు-
గరిమెల నిలిచిన కాణా చింతే. IIవెగ్గలII4-౨౪౨

ఉన్నచోనే మూఁడులోకా లూహించి చూచితే నీవే

శంకరాభరణం
ఉన్నచోనే మూఁడులోకా లూహించి చూచితే నీవే
కన్నచోటనే వెదకి కానఁ డింతేకాక. IIపల్లవిII

యెక్కడ వొయ్యెడి జీవుఁ డేది వైకుంఠము
యిక్కడ హరి యున్నాఁ డు హృదయమందె
ముక్కున నూరుపు మోచి ముంచి పుణ్యపాపాల-
కక్కసానఁ జిక్కి తమ్ముఁ గానఁ డింతేకాక. IIఉన్నII

యేమి విచారించి దేహి యెందు దేవుని వెదకీ
కామించి యాతఁ డిన్నిటాఁ గలిగుండఁగా
దోమటిసంసారపుదొంతికర్మములఁ జిక్కి
కాముకుడై కిందుమీఁదు గాన డింతేకాక. IIఉన్నII

యే విధులు తాఁ జేసీ యెవ్వరి నాడఁగఁబోయీ
శ్రీవేంకటేశ్వరుసేవ చేతనుండఁగా
భావ మాతఁడుగాను బ్రతికె నిదివో నేఁడు
కావరాన నిన్నాళు కానఁ డింతేకాక. IIఉన్నII ౩-౭౮

అన్నియు నాయందే కంటి నన్నిటివాఁడా నేనే

మాళవి
అన్నియు నాయందే కంటి నన్నిటివాఁడా నేనే
మున్నె నాభావముతో ముడిచివేసినది. IIపల్లవిII

చెలఁగి సంసారమే చింతించి సంసారినైతి
ములిగి ముక్తిదలఁచి ముక్తుఁడనైతి
పలుమతాలు దలఁచి పాషండబుద్ధినైతి
చెలఁగి శ్రీపతిఁ దలఁచి వైష్ణవుఁడనైతి. IIఅన్నిII

పొసఁగ బుణ్యముసేసి పుణ్యాత్ముఁడనైతి
పసలఁ బాపముచేసి పాపకర్ముఁడనైతి
వెస బ్రహ్మచారినైతి వేరె యాచారమున
మునిపి మరొకాచారమున సన్యాసినైతి. IIఅన్నిII

వొగి నొడ్డెభాషలాడి వొడ్డెవాఁడనైతిని
తెగి తెలుఁగాడ నేర్చి తెలుఁగువాడనైతి
అగడై శ్రీవేంకటేశ అన్నియు విడిచి నేను
తగు నీదాసుడనై దాసరి నే నైతి. IIఅన్నిII ౩-౩౭౯

పరుస మొక్క టేకాదా పయిఁడిగాఁ జేసేది

సామంతం
పరుస మొక్క టేకాదా పయిఁడిగాఁ జేసేది
అరయ లోహమెట్టున్నా నందుకేమీ. IIపల్లవిII

వనజనాభునిభక్తి వదలకుండినఁ జాలు
మనసు యెందు దిరిగినా మరియేమి
మొనసి ముద్రలు భుజముల నుండితేఁ జాలు
తనువెంతహేయమైనా దానికేమి. IIపరుసII

శ్రీ కాంతునామము జిహ్వఁ దగిలితే జాలు
యేకులజుఁడైనాను హీనమేమి
సాకారుఁడై నహరి శరణుచొచ్చినఁ జాలు
చేకొని పాపము లెన్ని చేసిననేమి. IIపరుసII

జీవుఁ డెట్టున్నా నేమి జీవునిలో యంతరాత్మ
శ్రీ వెంకటేశున కాచింతయేమి
యేవలనఁ బరమైన యిహమైన మాకుఁ జాలు
కై వశమాయ నతఁడు కడమలింకేమీ. IIపరుసII౧-౩౭౩

సడిఁబెట్టెఁ గటకటా సంసారము చూడ

భైరవి
సడిఁబెట్టెఁ గటకటా సంసారము చూడ-
జడధిలోపలియీఁత సంసారము. IIపల్లవిII

జమునోరిలో బ్రదుకు సంసారము చూడ-
చమురుదీసినదివ్వె సంసారము
సమయించుఁబెనుదెవులు సంసారము చూడ
సమరంబులో నునికి సంసారము. IIసడిII

సందిగట్టినతాడు సంసారము చూడ
సందికంతలలోని సంసారము
చందురినిజీవనము సంసారము
చంద మేవలెనుండు సంసారము. IIసడిII

చలువలోపలివేఁడి సంసారము చూడ
జలపూఁతబంగారు సంసారము
యిలలోనఁ దిరువేంకటేశ నీదాసులకు
చలువలకుఁ గడుఁజలువ సంసారము. IIసడిII౧౯౯

ఎదుట నెవ్వరు లేరు యింతా విష్ణుమయమే

Get this widget | Track details | eSnips Social DNA

పాడి
ఎదుట నెవ్వరు లేరు యింతా విష్ణుమయమే
వదలక హరిదాసవర్గమైనవారికి. IIపల్లవిII

ముంచిన నారాయణమూర్తులే యీజగమెల్ల
అంచిత నామములే యీ యక్షరాలెల్లా
పంచుకొన్న శ్రీహరిప్రసాద మీరుచులెల్లా
తెంచి వేసి మేలు దాఁ దెలిసేటివారికి. IIఎదుII

చేరి పారేటి నదులు శ్రీపాదతీర్థమే
భారపు యీ భూమెతనిపాదరేణువే
సారపుఁగర్మములు కేశవుని కైంకర్యములే
ధీరులై వివేకించి తెలిసేటివారికి. IIఎదుII

చిత్తములో భావమెల్లా శ్రీవేంకటేశుఁడే
హత్తిన ప్రకృతి యెల్లా నాతనిమాయే
మత్తిలి యీతనికంటే మరి లే దితరములు
తిత్తి దేహపుబ్రదుకు తెలిసేటివారికి. IIఎదుII౧-౫౦౨

ఎంతని నుతియింతు రామరామ యిట్టి నీప్రతాపము రామరామ

Get this widget | Track details | eSnips Social DNA

దేవగాంధారి
ఎంతని నుతియింతు రామరామ యిట్టి నీప్రతాపము రామరామ
పంతాన సముద్రము రామరామ బంధించవచ్చునా రామరామ. IIపల్లవిII

బలుసంజీవనికొండ రామరామ బంటుచేఁ దెప్పించితివి రామరామ
కొలఁదిలేనివాలిని రామరామ ఒక్కకోల నేసితివట రామరామ
వెలయ నెక్కువెట్టి రామరామ హరువిల్లు విరిచితివట రామరామ
పెలుచు భూమిజను రామరామ పెండ్లాడితివట రామరామ. IIఎంతనిII

శరణంటే విభీషణుని రామరామ చయ్యనఁ గాచితివట రామరామ
బిరుదుల రావణుని రామరామ పీఁచమడఁచితివట రామరామ
ధరలోఁ జక్రవాళము రామరామ దాఁటి వచ్చితివఁట రామరామ
సురలు నుతించిరట రామరామ నీ చొప్పు యిఁక నదియెంతో రామరామ. IIఎంతనిII

సౌమిత్రి భరతులు రామరామ శత్రుఘ్నులుఁ(డుఁ?) దమ్ములట రామరామ
నీ మహత్త్వము రామరామ నిండె జగములెల్లా రామరామ
శ్రీమంతుఁడ వన్నిటాను రామరామ శ్రీవేంకటగిరిమీఁది రామరామ
కామిత ఫలదుడవు రామరామ కౌసల్యానందనుఁడవు రామరామ. IIఎంతనిII

రామరామ అనే సంకీర్తనం మాటిమాటికీ వచ్చేలా చేసిన సంకీర్తనం -ఎంతో సుందరం-ఎంతో సుమధురం.

ఇన్నిటికి నోపునా యీ మనసు నన్ను

సాళంగనాట
ఇన్నిటికి నోపునా యీ మనసు నన్ను
మన్నించి నీ మనసు మరిగించుమనసు. IIపల్లవిII

పొలఁతులకాఁకనే పుటమెక్కె మనసు
చలివేఁడిజవ్వనమునందిఁ జిక్కె మనసు
వలరాజుతూపునంజు వడినెక్కె మనసు
మలసి రతిసుఖాలమరపాయ మనసు. IIఇన్నిII

పచ్చనికనకముపై భ్రమఁబడె మనసు
చిచ్చువంటి విషయాల శివమెత్తె మనసు
వొచ్చెపుఁ బాపాలకెల్లా నొడిగట్టె మనసు
బచ్చన చెంచెలములఁ బాటిచెడి మనసు. IIఇన్నిII

కోరి యంతలో గురుఁడు గూఁటవేసె మనసు
వోరుపుతో నీపాలి కొప్పగించె మనసు
ఈగీతి శ్రీవేంకటేశుఁడ నామనసు
తోరపు విజ్ఞానము తుదకెక్కె మనసు. IIఇన్నిII౪-౩౩౫

విచ్చనవిడినీ యాడీ వీఁడె కృష్ణుఁడు

దేవక్రియ
విచ్చనవిడినీ యాడీ వీఁడె కృష్ణుఁడు
వొచ్చెములేనివాఁడు వుద్దగిరికృష్ణుఁడు IIపల్లవిII

గల్లుగల్లుమనఁగాను గజ్జలు నందెలతోడ
బిల్లఁగోట్లాడీని పిన్నకృష్ణుఁడు
కెల్లురేఁగి వీధులనుఁ గేరి పుట్టచెండులాడీ
బల్లిదుఁడు గదవమ్మ బాలకృష్ణుఁడు. IIవిచ్చII

తమితోడ గోపాలులు తానుఁ గూడి ముంగిటను
సముద్రబిల్లలాడీ సాధుకృష్ణుడు
చెమటలుగార సిరిసింగనవత్తి యాడీ
గుమితాన వీఁడే యమ్మా గోపాలకృష్ణుఁడు. IIవిచ్చII

వుదుటునఁ బారి పారి వుడ్డగచ్చకాయలాడీ
ముదముదొలఁకఁగాను ముద్దుకృష్ణుఁడు
అదివో శ్రీవేంకటేశుఁ డాటలెల్లాఁ దానే యాడీ
పదివేలు చందాల శ్రీపతియైన కృష్ణుఁడు. IIవిచ్చII౪-౧౭౨

ఈ మధ్య బ్లాగులలో ఒకరిద్దరు పెద్దలు వారి వారి చిన్ననాటి ఆటలను గుర్తుచేసుకొని వారి పిల్లలు ఈ రోజుల్లో కంప్యూటర్ల మీదనే ఎక్కువకాలం గడపాల్సిరావటం గురించి తలచుకొని- ఆ యా ఆటపాటలను బ్లాగులలో వ్రాద్దామనుకోవటం చూసి ఈ కీర్తనను పోస్టు చేసాను. అన్నమయ్య గారి కాలంలో నున్న కొన్ని ఆటలు ఇందులో ఉన్నాయి. బిల్లంగోరు, పుట్టచెండ్లు, సముద్రబిల్లలు, సిరిసింగనావత్తి, వుడ్డగచ్చకాయ -ఈ ఆటలలో బిల్లంగోరు ఆట తప్ప మిగిలిన అటల గురించి నాకూ ఏమీ తెలియదు. హంసవింశతిలో ఇంకా కొన్ని ఆటలను పేర్కోవటం జరిగింది. ఈ ఆటలను ఏ విధంగా ఆడతారో తెలుసుకోవాలని ఉంది. తెలిసిన వారెవరైనా చెప్తారేమోననే చిన్న ఆశ. తీరుతుందనే అనిపిస్తున్నది.

నా 200వ పోస్టు--తక్కిన చదువు లొల్ల తప్పనొల్లా

ఈ ప్రచురణ నా నరసింహ బ్లాగులో 200వ ప్రచురణ. ఈ సందర్భంగా బ్లాగ్మిత్రులందరికీ నా శుభాకాంక్షలు. నా బ్లాగును ఆదరంతో వీక్షిస్తున్న మిత్రులందరికీ ఈ బ్లాగు మూలంగా నా హృదయపూర్వక ధన్యవాదాలు .
దేసాళం
తక్కిన చదువు లొల్ల తప్పనొల్లా
చక్కఁగ శ్రీహరి నీ శరణే చాలు. IIపల్లవిII

మోపులు మోవఁగ నొల్ల ములుగఁగ నొల్ల
తీపు నంజనొల్ల చేఁదు దినఁగ నొల్ల
పాపపుణ్యాలవి యొల్ల భవమునఁ బుట్టనొల్ల
శ్రీపతినే నిరతము చింతించుటే చాలు. IIతక్కిII

వడిగా బరువు లొల్ల వగరింప నేనొల్ల
వెడఁగు జీఁకటి యొల్ల వెలుఁగూ నొల్ల
యిడుముల వేఁడనొల్ల యెక్కువ భోగము లొల్ల
తడయక హరి నీ దాస్యమే చాలు. IIతక్కిII

అట్టె పథ్యము లొల్ల అవుషధము గొననొల్ల
మట్టులేని మణుఁగొల్ల మైల గానొల్ల
యిట్టె శ్రీవేంకటేశు నిరవుగ సేవించి
చుట్టుకొన్న యానందసుఖమే చాలు. IIతక్కిII ౪-౬౫

మనమందరం ఆ శ్రీహరినే శరణు వేడుదాం. ఆయనే మనందరికీ దిక్కూ మొక్కూ కూడా.