ఉ॥
శ్రీ నటలోదువలన్మదు ఝురీల సమాన తరంగ సంగి భృం
గీ నినదంబుకంటె; పిక కీర శిఖానల రాజి రాజిత
స్వానము కంటె; సంతతలసన్మహతీ బృహతీ కళావతీ
మానిత కచ్ఛపీక్వణన మాధురి కంటెను; నప్రతీక సం
ధ్యాసలునైక కేలికల నా కుహనావటుకోత్తమాంగ సం
ధానిత సాగరేంద్ర బలనా వలమాన తరంగ ఘంఘమా
సూన రవంబు కంటెను; మనోహర గాంగ తరంగ డోలికా
పీన మృణాళనాళ సరసీజదళౌదనమోది హంస ని
స్వానము కంటె; సౌరభ విభాసిత కల్ప మహీరుహోజ్వలల్
సూన సువృష్టి కంటె; పరిశుభ్ర మహీధర శృంగ నిర్గతా
హీన నవీన సీకర సమేడ్య పతజ్జలపాత జల్జల
ధ్వానము కంటె; బర్హిణ కదంబ మనః ప్రమదానుకల వ
ర్షాన వవారిద ప్రకట శబ్దము కంటెను; దాన పద్విష
న్మానవతీల సన్నటన మంజుల శింజిత తాల మానస
ద్గానము కంటె; నిష్ట వనితా కుచ కుంభ యుగోపగుహ నా
ధీన నితాంకర్షణ విధి ప్రకటీకృత తార హార సం
తాన సముద్భవత్కల నినాదము కంటె; కపోత పోత కం
ఠానయ నిక్వణాఢ్య నలినాయత దృజ్ఞ్మతంబు కంటె; శ్రీ
జానితనూభవ ప్రథన సంగత ఘర్మజలాపనీద వే
లాను తలీజనాయిత విలాసవతీ వసనాగ్ర చేల నా
న్యూన కరాంబుజద్వయ మనోహర కంకణ కింకిణీక ని
క్వాణము కంటె; భద్రగజ భాసుర బృంహిత పారశీక హే
షా నికరంబు కంటె; సరుసంబయి కోవిద కర్ణపేయమై
జాను తెనుంగు కైత నెల జవ్వని నొద్దిక దిద్ది చూపెదన్.
Oct 14, 2008
జాను తెనుంగు కైత - శ్రీ పులుగుర్త వేంకట రామ రాయ కవి
Jun 1, 2008
"కవితా వైజయంతి"
ఈ రోజు మధ్యాహ్నం సంస్కృతి టి.వి. లో శ్రీ మేడసాని మోహన్ గారి -అతిథి దేవో భవ- కర్యక్రమంలో ఆయన కరుణశ్రీ గారి
"కవితా వైజయంతి" గానం చేసారు. దాన్నిక్కడ మన బ్లాగు మిత్రులందరి కోసం పొందు పరుస్తున్నాను.
కవితా వైజయంతి
ఉత్పల మాలిక
దోసెడు పారిజాతములతో హృదయేశ్వరి మెల్లమెల్లగా
డాసిన భంగి, మేలిమి కడాని వరాల కరాలు వచ్చి క
న్మూసిన భంగి, కన్నె నగుమోము పయిన్ నునుసిగ్గుమొగ్గ కై
సేసినభంగి, అందములు చిందెడి నందనవాటి వెన్నెలల్
కాసిన భంగి, జానపదకాంతలు రాట్నము మీద దారముల్
తీసిన భంగి, క్రొవ్వలపు లేఖ శకుంతల తామరాకుపై
వ్రాసిన భంగి, పెండ్లి తలఁబ్రాల్ జవరాలు రవంత నిక్కి పై
బోసిన భంగి, గుండె వడబోసిన భంగి, కళావిపంచికల్
మ్రోసిన భంగి, పొంగు వలపుల్ తలపుల్ సొలపుల్ ప్రసన్నతల్
భాసురతల్ మనోజ్ఞతలు ప్రౌఢిమముల్ రసభావముల్ గడున్
భాసిల తెల్గుకైత నవభంగుల సంగతమై, యొకింతయున్
దోసములేని శబ్దములతో, నటనం బొనరించు పాద వి
న్యాసముతో, సమంచిత గుణంబులతో, సహజమ్ములౌ యతి
ప్రాసలతో, మనోజ్ఞమగు పాకముతో, మృదుశయ్యతో, అనా
యాస సమాసయుక్తి కలశాంబుధి తీర పురోనిషణ్ణ దే
వాసుర మండలాంతర విహార వికస్వర విశ్వమోహినీ
హాసవిలాస విభ్రమకరాంచల చంచల హేమకుంభ సం
భాసి సుధాఝురీ మధురిమమ్ములు గ్రమ్ము కొనన్ వలెన్; శర
న్మాస శుచిప్రసన్న యమునాతట సైకత సాంద్రచంద్రికా
రాస కలా కలాప మధుర వ్రజ యౌవత మధ్య మాధవ
శ్రీసుషమా ప్రపూర్ణ తులసీదళ సౌరభ సారసంపదల్
రాసులు రాసులై పొరలి రావలె; పొంపిరి పోవలెన్ నవో
ల్లాస వసంత రాగ రస లాలిత బాలరసాల పల్లవ
గ్రాస కషాయకంఠ కలకంఠ వధూకల కాకలీధ్వనుల్!
నాకు అర్ధం కాని పదబంధాలు:
కడాని
కళావిపంచికల్
పురోనిషణ్ణ
కషాయకంఠ
కలకంఠ
వధూకల
కాకలీ
చివరలో వచ్చిన పెద్ద సమాసాలు